2012年12月30日司會禱告文

阮佇天裡ㄟ父阮ㄟ主，感謝祢格一擺引導阮來到佇祢ㄟ聖殿內面,相及聚集敬拜祢。佇阮尤原還格歡喜迎接主祢降生ㄟ時，阮也要格用嘔咾ㄟ聲，謙誠ㄟ心來佇祢ㄟ聖殿裡面，要用詩歌，用嘴來讚美，願阮今仔日ㄟ敬拜攏成做香香ㄟ祭，奉獻在祢ㄟ面前。

阮佇天裡ㄟ父阮ㄟ主，主後2012年已經也到路尾，雖然有人講今年是世界末日，總是主祢有甲阮講 :『若是論彼日，彼時，人嗯知，天使也嗯知，子也嗯知，獨獨父知若定。』，主懇求祢赦免人ㄟ軟弱及無奈，因為人欠缺，至到無平安，懇求主祢來幫助,佇阮遇到坎坷ㄟ時，懇求主祢用雙手抱阮經過。佇阮遇到困難ㄟ時，懇求主祢用手牽阮擺除一切。佇阮軟弱無助ㄟ時，懇求祢賞賜智慧互阮明白。佇阮呀先無力ㄟ時，懇求祢賞賜氣力乎阮勇壯。

阮佇天裡ㄟ父阮ㄟ主，總是阮馬愛嘔咾祢，因為阮有對你懇求，就有對你ㄟ感謝，阮要為春天來嘔咾上帝，因為春天互土地生出希望。阮要為夏天來讚美上帝,因為夏天互五榖生出豐富。阮要為秋天來感謝上帝，因為秋天互打拼得到喜樂。阮要為冬天來榮耀上帝，因為冬天互生命充滿祝福。

阮佇天裡ㄟ父阮ㄟ主，今仔日也有多多人未來到祢ㄟ聖殿裡面甲你見面，因有可能在工作上打拼，馬有可能在厝內面有放未落ㄟ事頭，懇求主祢尤原將福氣賞賜佇因ㄟ身上及厝內，互就近祢及敬拜祢ㄟ人，攏通得到祢ㄟ恩典滿滿。

阮此時在祢ㄟ面前祈禱懇求甲感謝,攏是奉主耶穌基督聖尊名,阿門。