2008年11月28日司會禱告文

阮佇天裡ㄟ父阮ㄟ主，感謝祢保守阮經過一禮拜久ㄟ時間，佇這一禮拜久ㄟ時間中，阮由格體會到，主祢站佇阮ㄟ身邊保護阮，因為登阮看見天光ㄟ時，阮知主祢由格賞賜新ㄟ生命給阮，登阮日出日入攏凡事平安ㄟ時，阮知主祢攏無離開阮，阮感謝主祢ㄟ引導，也感謝祢互阮格一擺來佇祢ㄟ面前，相及敬拜主祢。

阮佇天裡ㄟ父阮ㄟ主，你是阮一生中唯一疼惜阮ㄟ父，因為你從來不擺放捨阮，當阮遇到無法度擔當ㄟ事時，你甲阮講：『我決斷無放捨你，決斷無離開你』，你按呢互阮有充滿ㄟ信心，來懇求主你幫助。當阮心中有疑問ㄟ時，你甲阮講：『目周未擺看見，耳孔未擺聽見，人的心未擺想著的，就是上帝為著疼伊的人見若所備辦的。』對按呢阮知，主你為阮所備辦，是超越阮所求。阮ㄟ心，阮ㄟ靈所遇到的，隴是阮受造ㄟ試煉，因為你愛阮堅強自己，你甲阮講：『我欲教示你應該行的路，我欲注目看你來勸戒你。』所以阮知，你愛阮所行是尊趁你、來敬謂你。主啊，你知阮ㄟ心思及意念，你也知阮所要行所要做的，阮那自己算阮頭前路，無依靠你，就自己末會得到，因為你甲阮講：『人的心計劃伊的路，獨獨耶和華定著伊的腳步。』，所以阮信，只要依靠主你，萬事攏通得到享通。因為你要互阮憂傷變成快樂，互阮ㄟ煩惱變成福氣。

感謝上帝，阮佇天裡ㄟ父，今仔日雖然有風抬入境，總是你ㄟ顧守阮，互若就近你ㄟ，攏通得到主你ㄟ保護，雖蒙有人無法度來到聖殿就近你，懇求主你用奇妙ㄟ權能，來互因知，主你攏甲因相及得佇。

阮佇天裡ㄟ父阮ㄟ主，阮愛嘔咾你，馬愛感謝你，阮所得到ㄟ，阮所享受ㄟ，攏是你甲阮應允，因為你講：『到恁年老，我猶原是按呢，到恁頭毛白，我猶原懷抱恁，我已經造恁，亦欲揹恁，我欲懷抱恁，亦要救恁。』

阮按呢祈禱懇求及感謝，攏是奉主耶穌基督ㄟ名求及感謝，啊們。

『我決斷無放捨你，決斷無離開你』-希伯來書13章5節

『目周未擺看見，耳孔未擺聽見，人的心未擺想著的，就是上帝為著疼伊的人見若所備辦的』

-哥林多前書2章9節

『我欲教示你應該行的路，我欲注目看你來勸戒你。』-詩篇32篇8節

『人的心計劃伊的路，獨獨耶和華定著伊的腳步。』-箴言16章9節

『到恁年老，我猶原是按呢，到恁頭毛白，我猶原懷抱恁，我已經造恁，亦欲揹恁，我欲懷抱恁，亦要救恁。』-以賽亞書46章4節